Comezamos de novo as publicacións no blog, pero desta vez co propósito de que esta páxina sexa unha ventá á nosa aula e poidamos compartir todo o que nela acontece. Por outra banda, servirá tamén para estar un pouco máis conectados no caso de ter que faltar uns días a clase.
Voltamos do Nadal con moitas ganas de estar xuntos, de aprender, de xogar na aula e no patio... E a verdade é que os días que nos acompañan están sendo moi fresquiños. Por isto, un día falando na asemblea sorprendémonos falando das cores que transmiten frío e das cores que nos transmiten caloriña. Chegamos a unha conclusión xeral: os distintos tipos de azul, o gris, branco, algúns verdes... dan frío!
Pero isto non quedou aquí!
Ao día seguinte levei unhas imaxes de paisaxes de diferentes partes do mundo. Sen dúbida, seguía coincidindo: nas que había branco, azul, verde... facía frío, seguro!
E comezamos a pensar... Quen vive alí onde todo está nevado? E habería animais?
Despois de moito falar... apareceron os animais do Ártico, e tivemos unha semana chea de propostas, contos e xogos relacionados con esta temática. Aquí vos deixamos un vídeo do que levamos feito (e haberá parte II, xa que aínda quedan cousas por facer e investigar), e uns vídeos que vimos na clase que nos encantaron!