Hoxe: números e conto

 MÉRCORES

Ola, familias! 

Hoxe os números van ser os protagonistas. Vouvos presentar algunhas ideas para traballar cos números na casa utilizando materiais que seguro tedes a man.

1. Podedes facer tarxetas con números e ter que enganchar o número de pinzas que indica cada tarxeta. Cos máis peques da clase, ata o momento, estamos traballando coas cantidades 1-2-3. Pode ser que algún sexa capaz de asociar cantidades maiores, pero tamén pode ser que non saiban facelo. Non pasa nada, o importante é aprender xogando e sen presión. Pouco a pouco os coñecementos irán asentándose :)

2. Utilizando unha oveira baleira, podemos escribir os números e colocar nos ocos a cantidade (de botóns, garabanzos, pedriñas, etc.). Esta actividade podedes tentala, sobre todo, cos nenos e nenas de 4 anos.

3. Tamén podemos xogar co trazo. Esta actividade fixémola na aula e témola no recanto matemático para que a fagan cando queiran practicar. Trazamos o número nun cartón e facemos o debuxo con pedriñas, botóns, garabanzos, boliñas de papel... A ver que se vos ocorre! 

4. Estas actividades tamén as fixemos na aula. Podedes utilizar números, se os tedes, e se non debuxalos nuns cartóns ou papeis. A nena ou neno ten que ordealos e colocar debaixo o número de castañas (ou calquera outra cousa). Aos peques de 4 pídolles que ordenen e conten, e axúdolles cando solicitan axuda. Cos de 3 facémolo ao mesmo tempo, contando con eles á vez, axudándoos e xogando cos números 1-2-3. 

E agora... SORPRESA! 

Para a hora do conto a profe Adelaida envíavos este conto titulado "Un becho estraño", que agardamos que vos guste moito moito. Pelocha anímavos a que debuxedes a este becho estraño nun folio na vosa casa coa axuda das vosas familias. Xa sabemos que sodes uns artistas e que faredes uns debuxos preciosísimos. 

Ánimo rapaces! Querémosvos moito, moitísimo! Bicos para todos e todas!